BASES CONCURSO DE EMPANADAS DE LAMPREA DAS VI XORNADAS DA LAMPREA EN PADRÓN
O Concello de Padrón organiza do 13 ao 22 de marzo de 2020 a VI edición das Xornadas Gastronómicas da Lamprea en Padrón.
Dentro destas xornadas ten lugar a celebración do Concurso de Empanadas de Lamprea o venres 20 de marzo do 2020 ás 20h no primeiro andar do Centro Social – Auditorio Municipal de Padrón.
Primeira. Finalidade.
Promocionar e poñer en valor o produto gastronómico da lamprea, recuperando a elaboración tradicional da empanada da lamprea moi ligada ao noso municipio e arredores.
Segunda. Obxectivos
Os principais obxectivos da convocatoria deste concurso son:
– Posta en valor da lamprea do río Ulla.
– Recuperar a elaboración tradicional da empanada de lamprea, un dos símbolos gastronómicos do noso municipio.
– Facer partícipe á poboación en xeral da riqueza deste produto gastronómico.
Terceira. Participantes
Poderán tomar parte no concurso todas aquelas persoas que o desexen maiores de 18 anos de idade e que cubran o formulario de inscrición, aceptando as bases do concurso.
Cuarta. Inscricións
A inscrición será de balde e realizarase na Oficina de Turismo de Padrón situada na Avenida de Compostela s/n, ou no correo electrónico turismo@padron.gal como data máxima o MÉRCORES 11 de marzo do 2020.
Quinta. Produto
O Concello de Padrón fará entrega dunha lamprea a cada persoa participante para a realización da empanada do concurso.
Sexta. Data e lugar de celebración
Venres 20 de marzo de 2020 ás 20:00h no primeiro piso do Centro Social – Auditorio Municipal de Padrón
Sétima. Presentación e identificación
As empanadas presentaranse o venres 20 de marzo ás 19:30 no primeiro piso do Centro Social – Auditorio Municipal de Padrón.
Unha vez presentadas as empanadas á organización colocará os respectivos números de participación a cada empanada, números que estarán vinculados aos datos persoais de cada participante para que a valoración por parte do xurado sexa neutral ata que se coñeza o fallo.
Oitava. Receitas
As empanadas que participen neste concurso deberán ter como principal ingrediente a lamprea.
Poderanse realizar con calquera tipo de masa.
Cada participante deberá poñer a receita escrita (indicando ingredientes e modo de preparación) a disposición do xurado no momento da presentación da empanada.
Novena. Xurado
O xurado estará composto por persoas ligadas á restauración ou especializadas neste produto, que emitirán o veredicto unha vez finalizado o evento.
As persoas integrantes do xurado outorgarán os premios segundo a valoración que fagan con seguintes criterios: presentación (ata cinco puntos), valores culinarios -sabor, olor, textura- (ata dez puntos) e orixinalidade/creatividade (ata cinco puntos).
Décima. Premios
Os premios do concurso serán:
– 1º premio: Diploma e 300€
– 2º premio: Diploma e 200€
– 3º premio: Diploma e 100€
Décima primeira . Condicións de participación
A participación neste concurso implica a aceptación das presentes bases así como a decisión do xurado.
Autorízase á organización a realizar e publicar cantas fotografías se consideren oportunas nos diferentes medios (prensa, redes sociais, etc.), como apoio á difusión e promoción das xornadas.
Máis información na Oficina de Turismo de Padrón, correo electrónico: turismo@padron.gal e no teléfono 646 59 33 19.
* Unha vez rematada a degustación por parte do xurado, as empanadas restantes serán servidas ao público asistente.
